Daar is nou maar nie ’n lekkerder reuk as gebak in die oond nie.  Ma  vra nou die dag vir my om ’n  baksel beskuit vir haar te bak.  Gaan karavaan staan maak op Vic baai saam met vriende.  Nou die karringmelkbeskuit resep kom so met die jare saam. So ’n  verbastering van Ma en Skoonma se resepte, lag-lag so 3 geslagte vêr.

Die blik panne wat my broer destyds op die Vrystaatse vlaktes vir my gekoop het, maak  die taak so maklik as om te sê  “die kat kry kleintjies agter die koolstoof”  Die van julle wat dit nie ken nie, kan gerus soek vir ’n  stel.  ’n Stel bestaan uit 2 plat panne wat die oond vol lê. en dan ’n sny patroon, presies in 77 stukkies afgemerk, wat net voor die bak slag gebruik word om die deeg mooi netjies in winkel mooi stukkies te sny. Ek sien Margot Swiss hou dit deesdae aan.  Daar is verskillende groottes om in verskillende oonde te pas. Maar elke sent in goud werd.

Een trapsel (Ouma Kowa het “een aanmaak slag” so gedoop) pas presies, kant en wal, die pan vol.  ’n Mens moet net nie vergeet om die sny raam te verwyder voor jy die spul in die oond druk nie. As jy wil weet watse gemors dit afgee, kan jy my eks skoonma vra.  Sy het daarna met ’n emmer krummels gesit as prys vir haar: “Ek weet wat ek doen!”

Maar terug by die geur!  Mense al is die beskuit so geheel en al in ’n  ander kombuis uitgedroog, was die geur uit die oond bevrediging genoeg vir hierdie boere sjef.

Hier is die heerlike beskuit se maklike resep:   

Maak 77 stukke

1 kg                        Bruismeel                           
2 k                          Klapper (Opsioneel)
3 k                          Meel                                    
500 g                      Botter
3 t                           Bakpoeier                          
500 mℓ                 Karringmelk  (500 mℓ melk en 2 e asyn)
1 t                           Sout                                      
2 k                          Suiker
3                              Eiers.                                    
Jy kan nog bodder met Vanielje, as jy wil, maar volgens my is dit  heeltemal  oorbodig.

·         Smelt die botter tot net loperig.

·         Klits die suiker en eiers hierby in.

·         Voeg die karringmelk hierby en  meng goed.

·         Meng die droë bestanddele in ’n skottel en meng die melkmengsel hierby. 

·         Meng goed en druk in panne.  As jy nie die fênsie panne het nie, kan dit in broodpanne ook gebak word. 

·         Bak teen 180° vir 25 tot 30 minute.

·         Haal uit die oond en laat tenminste 10 minute afkoel voordat dit uit die panne gegooi word.

·         Laat die beskuit heeltemal afkoel voordat dit gesny en dan gedroog word.

Makliker en lekkerder kry jy nie!

Dit bring my by een van die snaaksste verskynsels off vraagstukke van ons beroep.  Ek leer letterlik  tientalle studente,  sommige hooggeleerdes, die kuns van kos maak.  Almal baie in hul noppies met die nuut ontdekte vlyt, maar ’n ma en ’n skoonma sal altyd, beter en selfs beste weet. Al word daardie twee vrouens in jou lewe, niks wysgemaak nie, kan hulle jou blitsvinnig bê opdrag om hulle brouwerk te red of om die lekkernye wat hulle namens jou beloof het, op te tower.    Dan is die ekspedisie nog met ‘’n alomteenwoordige vadoekie oral  waar jy werk en ’n baie moederlike; “Is jy klaar met hierdie?” En wanneer jy omdraai is die spatel  waarmee jy nou net gewoel het, kurkdroog aan die haak.

Nou ja, Ma se beskuit het haar vriendin toe uitgedroog, want sien, ons oond se termostaat is so betroubaar soos ’n  plattelandse raadslid.  Sal wel hoor as dit nie lekker was nie.  Indien nie, sal die leë blik die kwaliteitsmeter wees, wanneer hulle terugkom. 

As jy nou ’n  gesonder weergawe van die beskuit wil bak, deel ek ’n vriendin van Kleinbrak se resep met jou.   Dis juis hierdie beskuit, wat sy my as geskenk gegee het wat my so hewig aan pan koop en beskuit bak gesit het.   Ek het selfs in die begin Rhona se panne geleen, tot ek my hande op my eie stel kon lê.

Hou die resep soos hierbo, vervang die 3k meel met 300g all bran flakes (die pak met die bessies, maak dit ekstra lekke) laat die bakpoeier weg en gooi  sommer vir die lekker ’n  koppie gekapte neute of sade by. 

So 2 stukkies van hierdie beskuit elke oggend saam met die troos en jy hoef nie eers elke veertien dae die bloubottel nader te trek nie!.

Geniet van huis tot huis

A